ஈரோடு மாவட்டத்தில் புகையிலை பொருள்கள் விற்ற 438 கடைகளுக்கு சீல்

ஈரோடு மாவட்டத்தில், புகையிலை மற்றும் நிகோட்டின் கலந்த உணவுப்பொருட்களை உற்பத்தி செய்வது, போக்குவரத்து செய்வது, இருப்பு வைப்பது மற்றும் சில்லறை விற்பனை செய்வது போன்றவை தடை செய்யப்பட்டுள்ளது. வியாபாரிகள் தடை செய்யப்பட்ட புகையிலை மற்றும் நிகோட்டின் கலந்த உணவுப்பொருட்களை விற்பனை செய்தால், உணவு பாதுகாப்புத்துறையின் மூலம் கடை மூடப்பட அவசரத் தடையாணை பிறப்பிக்கப்படும்.

ஈரோடு மாவட்டம் முழுவதும் நியமன அலுவலர் டாக்டர். தங்கவிக்னேஷ் மற்றும் 16 பேர் கொண்ட உணவு பாதுகாப்பு அலுவலர்கள் கொண்ட குழு, உள்ளாட்சி அமைப்புகள் மற்றும் காவல் துறையினரோடு ஒருங்கிணைந்து 5,181 கடைகளில் ஆய்வு மேற்கொள்ளப்பட்டது. இதில், 438 கடைகளில் தமிழக அரசால் தடை செய்யப்பட்ட ரூ.24 லட்சத்து 17 ஆயிரத்து 630 மதிப்பிலான சுமார் 2,822.33 கிலோ புகையிலை பொருட்கள் விற்பனை செய்வது கண்டறியப்பட்டதில், 1,905 கிலோ புகையிலை பொருட்கள் அழிப்பு குழு மூலமாக அழிக்கப்பட்டது. எஞ்சியுள்ள புகைப்பொருட்கள் காவல்துறையின் மூலம் இருப்பு வைக்கப்பட்டுள்ளது.

இதில், கூலிப் மட்டும் 259 கடைகளில் சுமார் 456.605 கிலோ கண்டறியப்பட்டு (அதன் மதிப்பு சுமார் ரூ.3 லட்சத்து 72 ஆயிரத்து 204) பறிமுதல் செய்யப்பட்டுள்ளது. மேற்படி, 438 பொருட்களின் விற்பனையாளர்கள் மீது ரூ.69 லட்சத்து 85 ஆயிரம் அபராதம் விதிக்கப்பட்டு, காவல்துறை மூலம் முதல் தகவல் அறிக்கை பதிவு செய்யப்பட்டு 438 கடைகளும் மூடப்பட்டுள்ளது.

அதில், முதல் முறையாக தடைசெய்யப்பட்ட புகையிலைப் பொருட்கள் விற்பனை செய்தவர்கள் 306 நபர்களுக்கு தலா ரூ.25 ஆயிரமும் அபராதமும், இரண்டாவது முறையாக தடைசெய்யப்பட்ட புகையிலைப்பொருட்கள் விற்பனை செய்த 4 நபர்களுக்கு தலா ரூ..50 ஆயிரமும் அபராதமும் விதிக்கப்பட்டுள்ளது. மேலும், தற்பொழுது அவர்களின் உணவு பாதுகாப்பு உரிமமானது ரத்து செய்யப்பட்டுள்ளது.

மேலும், ஈரோடு மாவட்டத்தில் உணவுத்தொழில் செய்து வரும் வணிகர்கள் இதுபோன்ற தடை செய்யப்பட்ட புகையிலைப்பொருட்களை விற்பனை செய்யக்கூடாது. ஈரோடு மாவட்டத்தில் உணவுப்பொருட்களின் தரம் தொடர்பான புகார்களை 94440-42322 என்ற வாட்ஸ் அப் எண்ணில் தெரிவிக்கலாம்.

இனி வருங்காலங்களில் உணவு பாதுகாப்புத்துறையினரின் ஆய்வின்போது தடை செய்யப்பட்ட புகையிலைப்பொருட்கள் விற்பனை செய்வது முதன்முறையாக கண்டறியப்பட்டால் ரூ.25 ஆயிரம் அபராதமும், 15 நாட்கள் கடையினை மூடவும், இரண்டாம் முறை கண்டறியப்பட்டால் ரூ.50 ஆயிரமும் அபராதமும், ஒரு மாதம் கடையினை மூடவும், மூன்றாம் முறையாகக் கண்டறியப்பட்டால் ரூ.1 லட்சம் அபராதம் விதிக்கப்படுவதுடன், 90 நாட்கள் கடையினை மூடவும் நடவடிக்கை மேற்கொள்ளப்படும்.

மேலும், தொடர்ந்து, விற்பனை செய்வது கண்டறியப்பட்டால் உடனடியாக உணவு பாதுகாப்பு உரிமம் அல்லது பதிவுச்சான்றிதழ் ரத்து செய்யப்படுவதோடு, கடையினை நிரந்தரமாக மூடிட உத்தரவிடப்படும். தொடர்ந்து இது போன்ற செயல்களில் திரும்ப ஈடுபட்டால் சம்பந்தப்பட்ட நபர்கள் குண்டர் சட்டத்தில் கைது செய்யப்படுவார்கள் என மாவட்ட ஆட்சியர் ராஜ கோபால் சுன்கரா எச்சரிக்கை விடுத்துள்ளார்.

Read more

ஈரோடு மாவட்டத்தில் ஜூன் 30ம் தேதி சிறப்பு கிராம சபைக் கூட்டம்: ஆட்சியர் அறிவிப்பு

ஈரோடு மாவட்ட ஆட்சியர் ராஜ கோபால் சுன்கரா வெளியிட்டுள்ள செய்திக்குறிப்பில் கூறியிருப்பதாவது:-

ஈரோடு மாவட்டத்திலுள்ள அனைத்து கிராம ஊராட்சிகளிலும் வரும் ஜூன் 30ம் தேதி (ஞாயிற்றுக்கிழமை) காலை 11 மணிக்கு சிறப்பு கிராம சபைக் கூட்டங்கள் நடைபெற உள்ளன. கூட்டம் நடைபெறும் இடம், நேரம், ஆகியன தொடர்புடைய கிராம ஊராட்சிகள் மூலம் பொதுமக்களுக்கு அறிவிக்கப்படும்.

ஈரோடு மாவட்டத்திலுள்ள அனைத்து கிராம ஊராட்சிகளிலும் பழுதடைந்த ஊரக வீடுகள் சீரமைத்தல் திட்டம் 2024-25 (ஓடுகள் மற்றும் சாய்ந்த ஆர்சிசி மேற்கூரை வீடுகளுக்கு சிறிய மற்றும் பெரிய பழுதுகளை சரிசெய்தல்) மற்றும் கலைஞரின் கனவு இல்லம் திட்டம் 2024-25 செயல்படுத்திட கிராம அளவிலான குழு மூலம் தேர்வு செய்யப்பட்ட தகுதியான பயனாளிகளை தேர்வு செய்ய சிறப்பு கிராம சபைக் கூட்டம் நடைபெறவுள்ளது.

அனைத்து கிராம ஊராட்சிகளும் கிராம சபைக் கூட்டங்கள் முறையாக நடைபெறுவதைக் கண்காணிக்கும் பொருட்டு வட்டார அளவில் உதவி இயக்குநர் நிலையில் பற்றாளர்கள் மற்றும் ஊராட்சி அளவிலான பற்றாளர்கள் நியமிக்கப்பட்டுள்ளனர். எனவே, இந்தக் கூட்டத்தில் அந்தந்த கிராமங்களைச் சோ்ந்த பொதுமக்கள் அனைவரும் கலந்து கொள்ள வேண்டும்.

இவ்வாறு அதில் கூறப்பட்டுள்ளது.

Read more

கோபிசெட்டிபாளையத்தில் ஜமாபந்தி நிறைவு நாளில் 30 பேருக்கு நலத்திட்ட உதவிகள்

ஈரோடு மாவட்டம் கோபிசெட்டிபாளையம் வருவாய் வட்டாட்சியர் அலுவலகத்தில் ஜமாபந்தி நிறைவு நாள் நிகழ்ச்சி இன்று (27ம் தேதி) நடைபெற்றது. வாணிப்புத்தூர் உள்வட்டத்தைச் சேர்ந்த கிராமங்களுக்கு நடைபெற்ற ஜமாபந்தியில் 30 பயனாளிகளுக்கு நலத்திட்ட உதவிகளை மாவட்ட ஆட்சியர் ராஜ கோபால் சுன்கரா வழங்கினார்.

ஈரோடு மாவட்டத்தில் 1433-ம் பசலிக்கான வருவாய் தீர்வாயம் எனப்படும் ஜமாபந்தி ஈரோடு மாவட்டத்திற்கு உட்பட்ட அனைத்து வட்டங்களிலும் கடந்த 20ம் தேதி துவங்கியது. அதனைத் தொடர்ந்து, இன்று (27ம் தேதி) நிறைவு நாள் நிகழ்ச்சி நடைபெற்றது. அதன்படி, கோபி வட்டாட்சியர் அலுவலகத்தில் மாவட்ட ஆட்சியர் ராஜ கோபால் சுன்கரா தலைமையில் ஜமாபந்தி நிறைவு நாள் நிகழ்ச்சி இன்று (27ம் தேதி) நடைபெற்றது.

வாணிப்புத்தூர் உள்வட்டத்துக்கு உட்பட்ட கிராம பொதுமக்களிடம் இருந்து இலவச வீட்டுமனைப்பட்டா, முதியோர் உதவித்தொகை, பட்டா மாறுதல் உள்ளிட்ட கோரிக்கைகள் அடங்கிய 176 கோரிக்கை மனுக்களை பெற்றுக் கொண்டு, பெறப்பட்ட மனுக்களின் மீது விரைவில் உரிய நடவடிக்கை மேற்கொண்டு தீர்வு காண தொடர்புடைய அலுவலர்களுக்கு உத்தரவிட்டார்.

தொடர்ந்து, வருவாய் மற்றும் பேரிடர் மேலாண்மைத்துறையின் சார்பில், சமூக பாதுகாப்புத் திட்டத்தின் கீழ் ஒரு பயனாளிக்கு ரூ.20 ஆயிரம் மதிப்பீட்டில் இயற்கை மரண உதவித்தொகையும், 21 பயனாளிகளுக்கு பட்டா மாறுதல் உத்தரவு ஆணைகளையும், 4 பயனாளிகளுக்கு ரூ.3 லட்சத்து 69 ஆயிரத்து 360 மதிப்பீட்டில் இலவச வீட்டுமனை பட்டாக்களையும் அவர் வழங்கினார்.

மேலும், வேளாண்மை உழவர் நலத்துறையின் சார்பில் முதலமைச்சரின் மண்ணுயிர் காத்து மன்னுயிர் காப்போம் திட்டத்தின் கீழ் 2 பயனாளிகளுக்கு தலா ரூபாய் ஆயிரம் மதிப்பில் பசுந்தாள் உரவிதையினையும், வேளாண்மை தொழில்நுட்ப மேலாண்மை முகமைத் திட்டத்தின் கீழ் ஒரு பயனாளிக்கு ரூ.4 ஆயிரம் மதிப்பில் தென்னையில் ஒருங்கிணைந்த கூட்டு மேலாண்மை தொகுப்பும், ஒரு பயனாளிக்கு ரூ.4 ஆயிரம் மதிப்பில் வீட்டு காய்கறி தோட்டம் அமைக்க மானியமும் என மொத்தம் 30 பயனாளிகளுக்கு ரூ.3 லட்சத்து 99 ஆயிரத்து 360 மதிப்பீட்டில் நலத்திட்ட உதவிகளை வழங்கினார். 

இந்நிகழ்ச்சியில், கோபிசெட்டிபாளையம் வருவாய் வட்டாட்சியர் கார்த்திக், உதவி இயக்குநர் (நில அளவை) ஹரிதாஸ் உட்பட தொடர்புடைய துறை அலுவலர்கள் கலந்து கொண்டனர்.

Read more

விஷச்சாராய சாவுக்கு முற்றுப்புள்ளி வைக்க பாராபட்சமற்ற நடவடிக்கை தேவை: கொங்கு வேளாளக்கவுண்டர்கள் பேரவை பொதுச்செயலாளர் எஸ்.சூர்யமூர்த்தி கோரிக்கை

இதுதொடர்பாக கொங்கு வேளாளக்கவுண்டர்கள் பேரவை பொதுச்செயலாளர் எஸ்.சூர்யமூர்த்தி வெளியிட்டுள்ள அறிக்கையில் கூறப்பட்டுள்ளதாவது:-

கள்ளக்குறிச்சியில் நடந்த விஷ சாராய மரணம் ஜீரணிக்க முடியாததாகும். அதிகாரிகளின் மெத்தன போக்கை உணர்ந்த தமிழ்நாடு முதல்-அமைச்சர் மு.க.ஸ்டாலின் துரித நடவடிக்கை எடுத்ததை ஏற்றுக்கொள்கிறோம். அதே நேரம் சாராயம் முற்றிலும் ஒழிக்கப்பட வேண்டும். இந்த சம்பவத்துக்கு பின் னர் தமிழ்நாடு முழுவதும் போலிசார் விரட்டிப்பிடித்து கைப்பற்றும் சாராய ஊறல்களின் எண்ணிக்கையை பார்த்தால் மாநிலம் முழுவதும் சாராயம் ஊடு ருவிப்போய் இருக்கிறது என்பதற்கு சான்றாக உள்ளது.

கொத்துக்கொத்தாக தாழ்த்தப்பட்ட, ஒடுக்கப்பட்ட, பிற்படுத்தப்பட்ட மக்கள் விஷ சாராயத்துக்கு பலியாவதை தடுக்க வேண்டும். இதற்கு அதிகாரிகளை பணியிடை நீக்கம் மற்றும் பணியிட மாற்றம் செய்வது மட்டுமே தீர்வாகாது. சாராயம் மற்றும் போதைப்பொருள் பிரச்சினைக்கு நிரந்தர தீர்வு காண ஆளும் கட்சியின் பொறுப்பாளர்கள், நிர்வாகிகள், மக்கள் பிரதிநிதிகள் யாராக இருந்தாலும் இந்த குற்றச்செயல்களுக்கு துணை போகக்கூடாது. அப்படி குற்றச்செயல்களில் ஈடுபடும் நிர்வாகிகள், துணைபோகும் நிர்வாகிகள் மீது கடுமையான நடவடிக்கையை எடுக்க வேண்டும். எந்த கட்சி ஆளும்கட்சியாக இருந்தாலும் அந்த கட்சித்தலைமை பாரபட்சமின்றி நடவடிக்கை எடுக்க வேண்டும்.

இவ்வாறு அதில் கூறப்பட்டுள்ளது.

Read more

பவானிசாகர் அணைக்கு நீர்வரத்து 7,781 கன அடியாக அதிகரிப்பு

ஈரோடு மாவட்டத்தின் முக்கிய நீராதாரமாக இருக்கும் பவானிசாகர் 105 அடி உயரமும், 32.8 டிஎம்சி கொள்ளளவும் கொண்டது. இந்த அணை மூலம் கீழ்பவானி வாய்க்கால், தடப்பள்ளி- அரக்கன்கோட்டை மற்றும் காலிங்கராயன் வாய்க்கால் வழியாக சுமார் 2.30 லட்சம் ஏக்கர் விளைநிலங்கள் பாசன வசதி பெறுகின்றன. அணையின் முக்கிய நீர்ப்பிடிப்பு பகுதியாக நீலகிரி மலைப்பகுதியும், மாயாறும் உள்ளன.

இந்த நிலையில், கடந்த 2 நாட்களாக நீலகிரி மலைப்பகுதியில் பரவலாக பலத்த மழை பெய்து வருகிறது. இதனால் அணைக்கு வரும் நீரின் அளவு அதிகரித்துள்ளது. நேற்று (ஜூன்.26) புதன்கிழமை காலை 8 மணி நிலவரப்படி வினாடிக்கு 936 கன அடியாக இருந்த நீர்வரத்து, இன்று (ஜூன்.27) வியாழக்கிழமை காலை 8 மணி நிலவரப்படி வினாடிக்கு 7,781 கன அடியாக அதிகரித்தது.

அதேபோல், அணையின் நீர்மட்டம் நேற்று காலை 58.93 அடியாக இருந்த நிலையில், இன்று காலை 60.24 அடியாக உயர்ந்தது. அப்போது, நீர் இருப்பு 7.33 டிஎம்சியாக இருந்தது. அணையில் இருந்து குடிநீர் தேவைக்காக பவானி ஆற்றில் வினாடிக்கு 200 கன அடி நீரும், கீழ்பவானி வாய்க்காலில் வினாடிக்கு 5 கன அடி நீரும் என மொத்தம் வினாடிக்கு 205 கன அடி வெளியேற்றப்பட்டு வருகிறது.

Read more

ஆல் இந்தியா பார் கவுன்சில் முயற்சியை ஏற்று மத்திய அரசு முப்பெரும் குற்றவியல் சட்டங்களில் கொண்டு வந்துள்ள சட்ட திருத்தங்களை திரும்ப பெற வேண்டும்... தவறும் பட்சத்தில் பல கட்ட போராட்டங்களை சேலம் மாவட்ட குற்றவியல் வழக்கறிஞர்கள் சங்கம் முன்னெடுக்கும்.

சேலம். 

S.K. சுரேஷ்பாபு. 

ஏற்கனவே அறிவித்திருந்த போராட்டத்தை கைவிட்டு நீதிமன்ற பணிகளுக்கு திரும்பிய சேலம் மாவட்ட குற்றவியல் வழக்கறிஞர்கள் சங்கத்தினர்.

இந்திய அரசு கொண்டுவந்துள்ள முப்பெரும் குற்றவியல் சட்டங்களில் சில மாற்றங்கள் செய்து இந்தி திணிப்பையும் மேற்கொண்டுள்ளது. இதனை கண்டித்து நாடு முழுவதும் ஆங்காங்கே வழக்கறிஞர்கள் சங்கத்தினர் பல்வேறு போராட்டங்களை மேற்கொண்டு வருகின்றனர். இந்த போராட்டத்தின் ஒரு பகுதியாக சேலம் மாவட்ட குற்றவியல் வழக்கறிஞர்கள் சங்கத்தில் உள்ள நிர்வாகிகள், வழக்கறிஞர்கள் மற்றும்  உறுப்பினர்கள் அனைவரும் நீதிமன்ற பணிகளில் இருந்து இன்று விலகிக் கொள்ளலாம் என்று ஏற்கனவே அறிவிப்பு வெளியிடப்பட்டிருந்தது.

இந்த நிலையில் நேற்று இரவு ஆல் இந்தியா பார் கவுன்சில் ஒரு அறிவிப்பு வெளியிட்டு இருந்தது. இந்திய அரசு கொண்டுவந்துள்ள முப்பெரும் குற்றவியல் சட்டத்தில் மேற்கொள்ளப்பட்டுள்ள சட்ட திருத்தங்களை திரும்பப் பெறுவதற்கு உண்டான முன் முயற்சியை ஆல் இந்தியா பார் கவுன்சில் முன்னெடுக்கும் என்ற என்ற உத்தரவாதத்தின் அடிப்படையில்,

 சேலம் மாவட்ட குற்றவியல் வழக்கறிஞர்கள் சங்க அவசர செயற்குழு கூட்டம் அந்த சங்கத்தின் தலைவர் வழக்கறிஞர் இமயவரம்பன் தலைமையில் நடைபெற்றது.  கட்டிடத்தில் கூடிய இந்த அவசர பொதுக்குழு கூட்டத்தில், 26-6-24 ம் தேதி All india bar council அனுப்பியுள்ள சுற்றறிக்கையை ஏற்று இன்று நடைபெறுவதாக அறிவித்திருந்த போராட்டத்தை கை விட அனைவரும் ஏக மணதாக முடிவு தெரிவித்ததால். சேலம் மாவட்ட குற்றவியல் வழக்கறிஞர்கள் சங்க உறுப்பினர்கள் நீதிமன்ற பணிகளுக்கு இன்று 27-6-24 செல்லலாம் என முடிவு செய்யப்பட்டு, சேலம் மாவட்ட குற்றவியல் வழக்கறிஞர்கள் சங்கத்தினர் அறிவித்திருந்த போராட்டத்தினை கைவிட்டு இன்று பணிக்கு திரும்பினார்.

 இது குறித்து சேலம் மாவட்ட குற்றவியல் வழக்கறிஞர்கள் சங்கத் தலைவர் இமயவரம்பன் கூறுகையில், ஆல் இந்தியா பார் கவுன்சில் அளித்துள்ள உத்தரவாதத்தை தாங்கள் நம்புவதாகவும், மத்திய அரசு கொண்டுவந்துள்ள முப்பெரும் குற்றவியல் சட்டங்களில் மேற்கொண்டுள்ள சட்டை திருத்தங்களை வாபஸ் வராவிட்டால், அடுத்த கட்ட போராட்டங்களை மிகத் தீவிரமாக முன்னெடுக்கும் என்றும் அச்சங்கத்தின் தலைவர் இமயவரம்பன் தெரிவித்தார்.

Read more

சத்தி அருகே வீட்டில் 8.5 கிலோ சந்தன மரக்கட்டை பதுக்கிய முதியவர் கைது

ஈரோடு மாவட்டம் சத்தியமங்கலம் வனச்சரகம் கெம்பநாயக்கன்பாளையம் காவல் சுற்றுக்கு உட்பட்ட கே.என்.பாளையம் நரசாபுரத்தில் சட்டவிரோதமாக வீட்டில் சந்தன மரக்கட்டை வைத்திருப்பதாக சத்தியமங்கலம் வனத்துறையினருக்கு நேற்று (25ம் தேதி) தகவல் கிடைத்தது.

அதன்பேரில், சத்தியமங்கலம் வனச்சரக அலுவலர் தலைமையிலான குழுவினர் மற்றும் பங்களாப்புதூர் போலீசார் அங்கு ரோந்து சென்று, அங்கு கருப்பணன் மகன் பெருமாள் என்ற கட்டபெருமாள் (வயது 64) என்பவரது வீட்டில் சோதனை நடத்தினர்.

அப்போது, வீட்டில் 8.5 கிலோ எடை கொண்ட சந்தன மரக்கட்டை பதுக்கி வைத்திருப்பது தெரியவந்தது. இதையடுத்து, பெருமாளை போலீசார் பிடித்து, சந்தனகட்டையுடன் அவரை வனத்துறையினரிடம் ஒப்படைத்தனர்.

பெருமாளிடம் வனத்துறையினர் சந்தன மரம் எங்கு வெட்டப்பட்டது. எந்தெந்த பகுதிகளில் சந்தன மரக்கட்டைகள் வெட்டப்படுகிறது. எங்கெல்லாம் சந்தன மரம் விற்பனை நடக்கிறது என்பது குறித்து தீவிர விசாரணை நடத்தினர்.

பின்னர், பெருமாளை நீதிமன்றத்தில் ஆஜர்படுத்திய வனத்துறையினர், நீதிமன்ற காவலில் வைத்துள்ளனர்.

Read more